२४ अंकले बढयो नेप्से परिसूचक

साप्ताहिक कारोबारको अन्तिम दिन बिहीबार सेयर कारोबार मापक नेप्से परिसूचक करिब २४ अंकले बढयो ।अघिल्लो दिन करिब साढे २७ अंकले बढेको नेप्से बिहीबार २३.९४ अंकले बढेर १ हजार २ सय ५०.३९ विन्दुमा पुगेको हो । अघिल्लो दिनको तुलनामा परिसूचक करिब २ प्रतिशतले बढी हो ।

पछिल्ला केही दिनयता सेयर बजार लगातार रूपमा बढिरहेको छ । यसले लगानीकर्ताको मनोबल बढाएको छ । बिहीबार दिनभर भएको ८ हजार ७ सय कारोबारबाट १ सय ६८ कम्पनीका १५ लाख १४ हजार ३ सय ६९ कित्ता सेयरको किनबेच भए । ती किनबेचबाट ६१ करोड ९३ लाख बराबरको सेयर कारोबार भयो ।



अघिल्लो दिनको तुलनामा कारोबार रकम झन्डै दोब्बर हो । कारोबारमा आएकामध्ये १ सय ४३ कम्पनीको सेयर मूल्य बढयो, १३ कम्पनीको सेयर मूल्य घटयो र १२ कम्पनीको सेयर मूल्य स्थिर छ ।

उक्त दिन कारोबारमा आएकामध्ये ९ वटा समूहका परिसूचक बढे । तर, व्यापार समूहको परिसूचक स्थिर छ । जसमध्ये बिमा समूहको परिसूचक सबैभन्दा बढी ३.११ प्रतिशतले बढयो ।

यसैगरी बैंकिङ समूहको परिसूचक १.७३, होटलको ०.८२, विकास बैंकको २.१७, जलविद्युत्को २.४५, लघुवित्तको २.५८ र उत्पादन तथा प्रशोधन समूहका परिसूचक २.२५ प्रतिशतले बढे । परिसूचक बढेपछि कुल बजार पुँजीकरण पनि बढेर १४ खर्ब ६५ अर्ब रुपैयाँ पुगेको छ ।

Source : Kantipur