प्रमुख गतिविधि
बैङ्कको गत मङ्सिरमा सम्पन्न १७औं वार्षिक साधारणसभाले शेयरधनीलाई १० प्रतिशत बोनस शेयर तथा कर प्रयोजनका निम्ति शून्य दशमलव ५३ प्रतिशत नगद लाभांश दिने प्रस्ताव पारित गरेको छ ।
कम्पनीले सार्वजनिक गरेको चालू आर्थिक वर्षको दोस्रो त्रैमासिक वित्तीय विवरणअनुसार आर्थिक वर्ष २०७४/७५ र २०७३/७४ बीच तुलना गर्दा :
- कम्पनीले चालू आर्थिक वर्ष २०७४/७५ को दोस्रो त्रैमासमा खुद मुनाफा ५१ करोड ९२ लाख रुपैयाँ कमाएको छ । यो गतवर्षको सोही अवधिको तुलनामा २८ प्रतिशत बढी हो । उसले गतवर्षको सोही अवधिमा ४० करोड ६३ लाख रुपैयाँ कमाएको थियो ।
- यो आवमा कम्पनीको चुक्तापूँजी अघिल्लो आवको सोही त्रैमासको तुलनामा १७१ प्रतिशत वृद्धि भई ८ अर्ब २२ करोड पुगेको छ । गत आवमा बैङ्कको चुक्तापूँजी ३ अर्ब ३ करोड ९२ लाख थियो ।
- ठुलो मात्रामा पूँजी वृद्धि गरेकाले अघिल्लो वर्षको तुलनामा बैङ्कको प्रतिशेयर आम्दानीमा कमी आएको छ । कम्पनीद्वारा प्रकशित दोस्रो त्रैमासको प्रतिवेदनअनुसार प्रतिशेयर आम्दानी १२ दशमलव ६३ रुपैयाँ छ ।
- दोस्रो त्रैमाससम्म आइपुग्दा जगेडा कोषमा सञ्चित रकम १ अर्ब ८८ करोड पुर्याएकोे छ । प्रस्तावित लाभांश तथा लेखापरीक्षण समायोजनका कारण जगेडा कोषको आकार समीक्षा अवधिमा ४८ प्रतिशत कमी आएको देखिन्छ ।
- निक्षेप र कर्जाको कुरा गर्दा उसले योे त्रैमासमा ६० अर्ब २७ करोड निक्षेप उठाई ५५ अर्ब २ करोड कर्जा प्रवाह गरेको छ ।
- निक्षेप ९ प्रतिशत वृद्धि भएको छ भने कर्जा प्रवाह १८ प्रतिशत वृद्धि भएको छ ।
- खुद ब्याज आम्दानीे २९ प्रतिशत बढाउँदै ९९ करोड ९८ लाख रुपैयाँ आम्दानी गरेको छ ।
- सञ्चालन मुनाफा ४१ प्रतिशत बढाउँदै ६९ करोड ५ लाख रुपैयाँ पुर्याएको छ ।
- बैङ्कले जोखीमबापत १९ करोड ६ लाख रुपैयाँ व्यवस्था गरेको छ भने जोखीम कोषबाट ४ करोड ३८ लाख रुपैयाँ फिर्ता गरेको छ ।
- बैङ्कको निष्क्रिय कर्जा कम भएर १ दशमलव ३१ प्रतिशतबाट १ दशमलव २९ प्रतिशतमा आएको छ ।
- निक्षेप सङ्कलनको अनुपातमा कर्जा लगानीको अनुपात बढेपछि सीसीडी रेशियो ७७ दशमलव ९३ प्रतिशत पुगेको छ ।
- बैङ्कले प्रकाशन गरेको वित्तीय विवरणअनुसार प्रतिशेयर नेटवर्थ १२२ दशमलव ९४ रुपैयाँ, कोषको लागत ७ दशमलव ४२ प्रतिशत र तरलता अनुपात २१ दशमलव ५६ प्रतिशत छ ।
समीक्षा अवधिमा बैङ्कले ठूलो मात्रामा आफ्नो चुक्तापूँजी वृद्धि गरेअनुरूप खुद मुनाफा वृद्धि भएको छैन । यस्तो अवस्थामा प्रतिशेयर आम्दानीमा कमी आउनु स्वाभाविक मान्नुपर्ने हुन्छ । बैङ्कका अन्य वित्तीय सूचकतर्फ हेर्ने हो भने प्रगति भने सन्तोषजनक देखिन्छ । निक्षेप सङ्कलन, कर्जा परिचालन, खुद ब्याज आम्दानी र खुद मुनाफामा सुधार गर्दै बैङ्क अघि बढ्दै गरेको देखिन्छ ।
प्राविधिक विश्लेषण : लक्ष्मी बैङ्क टेवाक्षेत्रमा
बजारको अवस्था
यस कम्पनीको ११ अप्रिल, २०१८ सम्मको दैनिक मैनबत्ती चार्टको आधारमा अन्तिम कारोबार मूल्य २ सय ४४ मा छ । अघिल्लो दिन पनि यही मूल्यमा बजार बन्द भएको थियो । त्यस दिनको परिमाण ४ हजार १ सय ७७ मा छ । यो अघिल्लो दिनको भन्दा २ हजार ८ सय ४७ कित्ता कम हो ।
मूल्यको प्रवृत्ति विश्लेषण :
३ सातादेखि मूल्य बढे पनि चार्टमा देखिएबमोजिम विगत ८ महीनादेखि बजारको माथिल्ला र तल्ला बिन्दुहरू घटिरहेकाले बजार पूर्णरूपमा बढ्दो प्रवृत्तिमा रहेको देखिँदैन । हाल मूल्य केही सच्चिएर टेवा क्षेत्रतिर रहेको देखिन्छ ।
अन्य प्राविधिक सङ्केतहरू :
एक्सपोनेन्सियल मुभिङ एभरेज (ईएमए) : ५० दिनको ईएमएभन्दा मूल्यको प्रवृत्ति तल रहेकोले बजार घट्दो प्रवृत्तिमा रहेको देखिन्छ । यो ईएमए हाल प्रतिरोधको रूपमा देखिन्छ ।
स्टोकास्टिक अक्सिलेटर : यो सूचकले पछिल्लो समयमा क्रेताको चाप केही कम भएको सङ्केत गर्दछ ।
रिलेटिभ स्ट्रेन्थ इण्डेक्स (आरएसआई) : १४ दिनको आरएसआई ५० अङ्कमा छ । यसको प्रवृत्तिले बजार सकारात्मक क्षेत्रमा रहेको सङ्केत गर्दछ ।
मैनबत्ती : अन्तिम दिनको मैनबत्तीले त्यस दिन बजारमा क्रेताको चाप रहेको देखिन्छ ।
निष्कर्ष
यदि मूल्य २ सय ६० भन्दा माथि स्थिर रहन सकेमा बजार अझ सकारात्मक हुन सक्ने प्रबल सम्भावना देखिन्छ । त्यस्तै, यदि मूल्य २ सय २४ भन्दा तल रहेकमा बजार नकारात्मक हुन सक्ने र अर्को तत्कालीन टेवा २ सय ९ मा देखिन्छ ।
Source : Abhiyan
No comments:
Post a Comment